اسلام آباد۔1ستمبر(اے پی پی) وزیراعظم شہباز شریف 300 یونٹ تئیں فیول ایڈجسٹمنٹ چارجز ختم کرݨ دا اعلان کریندے آکھیے جو میں سودھا کوئی وی نی چاہندا جو کہیں غریب تے ہک ٹکے دا وی ٻھار سٹیڄے ٻھل 2 روپے 7 پیسے پٹرول دا ملھ مجبورا ودھاوݨا پئے، اقتدار ملیا ہا تاں پتا لڳ ڳیا ہا جو اڳو کتنا اوکھ آسی، پٹرول دا ودھدا ملھ ہک وفا مسلہ ہا، ونڄݨ آلے وی ساݙے کیتے بارودی سرنگاں وچھا ڳین، پچھلی نااہل، کرپٹ حکومت عام لوکاں کیتے کڄھ وی نی کیتا، ڄݙاں انہاں کوں اپݨی چھٹی دا پتا لڳے تاں انہاں ڄاݨ ٻڄھ تے پٹرول سستا کر ݙتے جو آوݨ آلیاں کوں ٻھوڳݨا پووے،پچھکی حکومت 20 ہزار ارب دے قرض ڳھدن اتے ملک کوں ݙیوالہ کرݨ تئیں پچا ڳین آئی ایم ایف نال معاہدہ ہک چیلنج ہا، اساں آئے ہیں تاں اے معاہدہ مک ستا ہا ٻھل اساں آن کے ملکی معیشت کوں سنٻھالیے اتے آئی ایم ایف کوں وی ڳوݙے ٹیکݨے پین۔ اے ڳالھ انہاں ارکان اسمبلی نال ملاقات اتے خطاب کرݨ ویلھے آکھی۔ انہاں آکھیا جو کھنݙ تے رعایت دے ناں تے ارباں روپے لٹیے ڳین، گزشتہ حکومت کݨک پہلے ایکسپورٹ کیتی اتے ول مہناگی کݨک امپورٹ کریندے رہین، ایل این جی نا ڳھن تے گیس دا بحران پیدا کیتا ڳئے، یوکرین جنگ ٻئے عذاب سٹین، پوݨے چار سال دا اے تماشا سارا جیوݨ میں نی ݙٹھا۔ وزیر اعظم آکھیے جو آئی ایم ایف نال معاہدہ تھیوݨ نال اللہ دا شکر اے جو پاکستان ڈیوالا تھیوݨ توں بچ ڳئے، سیلاب زدگان دی بحالی وݙا مسلہ اے جیندے تے پورے لاھسوں، اپݨے لوکاں دء ٻھرپور امداد، ریلیف اتے بحالی یقینی ٻݨاعی ویسی۔
.jpg)