اسلام آباد۔30دسمبر(اے پی پی):قومی سلامتی کمیٹی ݙوٹوک رائے دا اظہار کیتے جو پاکستان دے قومی مفادات تے کوئی آنچ نہ آوݨ ݙتی ویسی ،پاکستان دی بقا، سلامتی اتے ترقی دے بنیادی مفادات دا نہایت جرات وبہادری، مستقل مزاجی اتے ثابت قدمی نال تحفظ کیتا ویسی ، پوری قوم دہشت گردی اتے دہشت گرداں دے خلاف ھک بیانیے تے ھک مٹھ اے ۔ قومی سلامتی کمیٹی (این ایس سی) دا اہم اجلاس جمعہ کوں وزیراعظم شہبازشریف دی صدارت اچ تھیا ۔ اجلاس اچ وفاقی وزراء، سروسز چیفس اتے انٹیلی جنس اداریں دے سربراہان شرکت کیتی۔ وزیراعظم آفس دے پریس ونگ توں جاری بیان موجب اجلاس ملکی معیشت اتے امن وامان دا تفصیل نال جائزہ ڳھدا ۔ وزیرخزانہ اسحاق ڈار ملک دی معاشی صورتحال اتے چیلنجز بارے ݙسایا تے ایں ضمن اچ حکومت دی طرفوں اختیار کیتی ڳئی معاشی حکمت عملی اتے اقدامات بارے شرکاءکوں بریفنگ ݙتی۔ انٹیلی جنس اداریں ملک اچ امن وامان دی مجموعی صورتحال تے بریفنگ ݙتی اتے دہشت گردی دی اڄوکی لہر متعلق عوامل اتے انہاں دے سدباب دے اقدامات نال اجلاس کوں ݙسایا ۔ وزیر مملکت خارجہ حنا ربانی کھر افغانستان دی صورتحال تے اجلاس کوں بریفنگ ݙتی تے پاکستان دے افغانستان دی عبوری حکومت توں تھیوݨ آلے رابطے بارے ݙسایا ۔ اجلاس ݙوٹوک رائے دا اظہار کیتا جو پاکستان دے قومی مفادات تے کوئی آنچ نہ آوݨ ݙتی ویسی نہ ہی کہیں کوں وی قومی سلامتی دے کلیدی تصور کوں ضیان پڄاوݨ دی اجازت ݙیسوں۔ پاکستان دی بقا، سلامتی اتے ترقی دے بنیادی مفادات دا نہایت جرات وبہادری، مستقل مزاجی اتے ثابت قدمی نال تحفظ کیتا ویسی ۔ اجلاس دہشت گردی دے خلاف شہداءدی عظیم قربانیاں کوں خراج عقیدت پیش کریندے ہوئیں انہاں دے اہل خانہ نال ہمدردی اتے تعزیت دا اظہار کیتے تے شہدا دے درجات دی بلندی کیتے اجتماعی دعا کیتی۔ اجلاس دے شرکاء آکھیے دہشت گردپاکستان دے دشمن ہن تے ایں عزم دا اظہار کیتے جو پوری قوم دہشت گرداں دے خلاف ھک بیانیہ تے ھک مٹھ اے ، پاکستان کوں للکارݨ آلیں کوں پوری طاقت نال جواب ملسی ۔ نیشنل سکیورٹی کمیٹی (این ایس سی) دا اجلاس 2 جنوری 2023کوں جاری رہیسی جیں اچ سامݨے آوݨ آلی تجاویز دی روشنی اچ مزید فیصلے کیتے ویسن ۔
