حیدرآباد۔ 20 جولائی (اے پی پی):پاکستان ریلوے موہن جو دڑو مسافر ٹرین کوں کوٹری اتے روہڑی توں ھکے ویلھے بحال کرݙتا ، وفاقی وزیر ریلوے و شہری ہوا بازی خواجہ سعد رفیق ٹرین دی بحالی دا اعلان کیتا ہئی ۔ خمیس دی سویل کوٹری ریلوے سٹیشن تے ھک تقریب منعقد تھئی ،ڈی ایس ریلوے کراچی محمد ناصر خلیلی ربن کٹ تے ریل ڳاݙی دا افتتاح کیتا تے دعائے خیر کیتی۔ ٹرین کوں سوہݨے انداز اچ سجایا ڳیا ۔کوٹری تے روہڑی سٹیشنز تے منعقدہ بیک وقت افتتاحی تقریب توں وفاقی وزیر ریلوے و شہری ہوا بازی خواجہ سعد رفیق وڈیو لنک تے شرکت کیتی ،انہاں دے رلے چیئرمین پاکستان ریلوے سید مظہر علی شاہ وی ہن۔کوٹری سٹیشن تے منعقدہ تقریب اچ ڈی ایس ریلوے کراچی محمد ناصر خلیل دے علاوہ ڈی سی او صبا جبین ،ڈی ٹی او سجاد احمد واگھواتے جملہ ڈویژنل ، اسسٹنٹ افسران اتے اسٹیشن ماسٹرکوٹری وی موجود ہن ۔موہن جودوڑو پسنجر ٹرین اچ 10اکانومی کوچز اتے ھک پاور وین اتے بریک وین تے مشتمل اے جنہاں اچ 856مسافراں دے ٻہݨ دی گنجائش اے ۔اے ٹرین کوٹری توں روہڑی ویندے ہوئیں سندھ یونیورسٹی جامشورو ، سیہوݨ ، دادو ، رحمانی نگر،موہن جودڑو ،باقرانی روڈ ، لاڑکانہ ،شاہنواز بھٹو ،حبیب کوٹ اتے سکھرریلوے سٹیشنز توں تھیندی ہوئی 22چھوٹے وݙے سٹاپ کریسی ۔موہن جودوڑو ٹرین دی بحالی نال مذکورہ روٹ تے رہݨ آلے عوام کوں خوشی تھئی اے ،اے پسنجر ٹرین اَپ213کوٹری توں روزانہ سویلے سوا 8 وڄے روانہ تھیسی تے شام 7وڄ تے 30منٹ تے روہڑی ریلوے سٹیشن پڄسی اتے روہڑی توں سویلے 7وڄے کوٹری کیتے روانہ تھیسی تے سوا6 وڄے شام کوٹری ریلوے سٹیشن تے پڄ ویسی ۔واضح رہے گزریل سال مینھ تے چھل پاروں 26اگست کوں موہن جو دڑو ریل ڳاݙی معطل کرݙتی ڳئی ہئی جیڑھی 11مہینے بعد بحال کرݙتی ڳئی اے۔
